SIDNEJ, 17 shtator /ATSH-DPA/ – Kryeministri australian, Scott Morrison hodhi poshtë përgjigjen e zemëruar të Kinës ndaj një aleance sigurie me SHBA dhe Britaninë e Madhe, që do të sillte si rezultat edhe faktin që Kanberra do të blinte nëndetëse me energji bërthamore.
Kina nuk u përmend drejtpërdrejt në njoftimin e përbashkët të së ashtuquajturës ”aleanca AUKUS”, por presidenti amerikan, Joe Biden iu referua kërcënimeve në zhvillim të shpejtë dhe nevojës për të forcuar sigurinë dhe parandalimin ushtarak në rajonin e Indo-Paqësorit.
Morrison tha se masa ishte “në interesin e të gjithëve, përfshirë interesin e Kinës” për të mbajtur një rajon të sigurt dhe të qëndrueshëm, por shtoi se Australia ka të drejtë të marrë vendime në interesat e saj dhe se vetë Kina “ka një program shumë thelbësor të ndërtimit të armëve bërthamore”.
Ministri australian i Mbrojtjes, Peter Dutton i tha Sky News Australia se komentet e medias kineze për AUKUS-in ishin “të turpshme”.
Ambasada kineze në Australi deklaroi se vendi duhet të “braktisë mentalitetin e vjetruar të Luftës së Ftohtë dhe perceptimin e ngushtë gjeopolitik dhe të ndalojë rrëshqitjen më tej në rrugën e dëmtimit të marrëdhënieve Kinë-Australi”./ /os/
