TIRANË, 16 gusht/ATSH/ Për tre netë me radhë, artdashësit fierakë kanë mundësi të ndjekin në skenën e teatrit “Bylis”, komedinë “V në kub” nga Sara Bogati, e cila çel sezonin e ri teatror në Fier.
Komedia, e cila u vendos në skenë mbrëmjen e djeshme, do t’u ofrohet artdashësve fierakë edhe në datat 16 dhe 17 gusht, duke çelur kështu siparin e projekteve të reja artistike në skenën e teatrit “Bylis”.
Me regji të artistit shkodran Bruno Shllaku, komedia vjen nën interpretimin e aktoreve të mirënjohura fierake, Miola Sitaj, Mimoza Marjanaku dhe Rudina Nallbani.
Komedia ka në qendër të saj jetën sentimentale të tre grave të reja, me profesione të ndryshme në kërkim të dashurisë së tyre.
Ajo trajton barazinë gjinore dhe shumë probleme aktuale të kohës.
/m.m/j.p/
