TIRANË 11 gusht /ATSH-I.Vata/ Bashkia e Bulqizës ka përfunduar punimet e kanalit ujitës Tuçep-Çerenec, që do të ju shërbejë disa fshatrave për vaditjen e më shumë se 700 ha tokë.
Lajmi bëhet i ditur nga kryetari i bashkisë Bulqizë, Lefter Alla i cili shprehet se ky është një premtim i mbajtur.
“Kanali ujitës Tuçep-Çerenec ka qenë një nga projektet e premtuara elektorale, për realizimin e të cilit kemi punuar me shumë përkushtim. Janë rreth 700 ha sipërfaqe bujqësore që do të përfitojnë nga ky kanal, ku tashmë ka përfunduar më shumë se gjysma e tij”, shprehet ai.
“Një premtim i mbajtur për banorët e fshatrave Tuçep, Ostren i Vogël, Lladomericë, Miresh, Terbaç, Golevisht, Viçisht e Çerenec. Ne do të vazhdojmë të jemi kudo në Bulqizë, në çdo njësi, fshat apo lagje”, shprehet ai.
/r.e/
