TIRANË 14 korrik /ATSH-I.Vata/ Ministrja e Drejtësisë Etilada Gjonaj ka zhvilluar sot një tryezë diskutimi me partnerët e sistemit penitenciar të Italisë.
Tryeza e diskutimeve u zhvillua në ambientet e Ministrisë të Drejtësisë në Tiranë dhe kishte në fokus regjimin “41 Bis” dhe menaxhimin e sistemit penitenciar.
Ministrja Gjonaj tha se “kjo tryezë shërbeu për të ndarë eksperiencat midis të dy ekipeve për procedurat e ndjekura për vendosjen e subjekteve të rrezikshëm në këtë regjim edhe me përfaqësues të Prokurorisë së Posaçme dhe institucioneve ligjzbatuese me një rol domethënës në këtë proces”.
“Sfidat e zbatimit te regjimit të posaçëm ishin gjithashtu pjesë e diskutimit të kësaj tryeze, duke përfituar nga eksperienca italiane tashmë 30-vjeçare në regjimin “41 Bis”. Ky është vetëm hapi i parë i një bashkëpunimi të ngushtë midis dy drejtorive të burgjeve”, tha Gjonaj.
/r.e/
