TIRANË, 7 korrik /ATSH/ Treguesi i ndjesisë ekonomike u rrit për të shtatin muaj radhazi në muajin qershor të këtij viti.
Banka e Shqipërisë publikoi sot vrojtimin e besimit të biznesit dhe të konsumatori, mbi pritshmërinë e ekonomisë, për të ardhmen.
Sipas BSH-së, treguesi i ndjesisë ekonomike, shënoi një rritje prej 1.6 % krahasuar me nivelin e muajit maj 2021.
Ecuria pozitive e qershorit u përcaktua kryesisht nga rritja e besimit në sektorët e shërbimeve dhe të tregtisë. Gjithashtu, edhe besimi konsumator u përmirësua.
Treguesi i besimit në shërbime u rrit me 4.1 % krahasuar me muajin maj. Kjo rritje u ndikua si nga komponenti i lidhur me ecurinë e biznesit ashtu edhe nga komponenti i lidhur me kërkesën. Përmirësim të konsiderueshëm krahasuar me muajt pararendës shënoi edhe treguesi i gjendjes financiare të bizneseve në këtë sektor.
Treguesi i besimit në tregti u rrit me 2.2 % krahasuar me muajin e kaluar, duke vijuar të mbetet mbi mesataren e tij afatgjatë. Rritja ka ardhur nga të dy komponentët përbërës të ecuria aktuale e biznesit dhe pritjet për nivelin e punësimit.
Ndërsa treguesi i besimit konsumator u rrit me 0.4 % në muajin qershor, duke vijuar tendencën pozitive të muajve të fundit, ndonëse në një masë më të kufizuar. Rritjen e udhëhoqi pritja pozitive për situatën e përgjithshme ekonomike në të ardhmen, shoqëruar nga përmirësime të lehta edhe të pritjeve për situatën e tyre financiare në të ardhmen, si dhe pritjet për blerjet në shuma të mëdha.
/j.p/r.e/
