TIRANË, 23 qershor /ATSH/ Banka e Shqipërisë bën të ditur se politika monetare lehtësuese është e përshtatshme në mbështetjen e aktivitetit ekonomik të vendit dhe krijon frymëmarrje për institucionet financiare.
Sipas BSH-së, rimëkëmbja e plotë e ekonomisë dhe rritja e qëndrueshme e inflacionit drejt objektivit 3 % në fund të vitit 2022, duhet të vijojë të mbështetet nga një profil stimulues i politikës monetare, ku norma bazë e interesit, për lekun do të vijojë të jetë në nivelin 0.5 %.
Banka Qendrore theskon se, “për të kaluar nga politika monetare lehtësuese, pra me norma të ulëta interesi, në një politikë monetare shtrënguese, që do të thotë rritje e normës së interesit, duhet të kemi një situatë më të mirë ekonomike, pritshmëri e cila pritet para fundit të vitit 2022”.
“Në kushtet aktuale Banka e Shqipërisë, gjykon që politika monetare lehtësuese do të vazhdojë për një periudhë të gjatë. Të paktën deri në gjysmën e dytë të vitit 2022 politika monetare, do të vazhdojë me normën e interesit 0.5 %.
Presim përmirësim të ekonomisë, presim ringritje dhe politika monetare do të vijojë dhe do të përshtatet me zhvillimet ekonomike”, thekson BSH-ja. /j.p/r.e/
