Cila është koha më e mirë për të marrë vitaminat?

ROMË, 9 mars /ATSH/ – Për të funksionuar si duhet, trupi ka nevojë për vitamina, të cilat ndahen në të tretshme në ujë dhe të tretshme në yndyrë, shkruhet në faqen italiane të internetit, ilgiornale.it.

Megjithëse këto lëndë ushqyese gjenden në sasi të ndryshme në ushqim, duke e bërë të vështirë të flasësh për një mungesë të plotë në situata normale, disa njerëz kanë nevojë të plotësohen me disa vitamina në kushte të veçanta.

Normalisht, shumica e vitaminave mund të merren në çdo kohë të ditës.

Sidoqoftë, jo të gjitha vitaminat janë të njëjta dhe është mirë t’i njohësh pak më shumë për të ditur nëse ka kohë më të favorshme për t’i marrë.

Vitaminat e tretshme në ujë përfshijnë vitaminën C, vitaminat B: B1 (tiaminë), B2 (riboflavinë), B3 (niacinë), B5 (acid pantotenik), B6 ​​(piridoksinë), B9 (folat) dhe B12 (kobalamin), vitaminën H (biotinë) dhe vitaminën PP (niacinë).

Vitaminat e tretshme në ujë nuk kanë nevojë të merren me ushqim për t’u administruar.

Prandaj mund të merren me ose pa ushqim, në çdo kohë të ditës, megjithëse shpesh rekomandohet në mëngjes për shkak të rolit të tyre të rëndësishëm në metabolizmin e lëndëve ushqyese dhe prodhimin e energjisë.

Personat me mungesë të vitaminës B12 këshillohen gjithashtu të marrin suplemente të kësaj vitamine me stomakun bosh për të nxitur thithjen maksimale.

Këto lëndë ushqyese nuk ruhen në indet e trupit, por sekretohen përmes urinës.

Ndryshe nga vitaminat e tretshme në ujë, vitaminat e tretshme në yndyrë varen nga yndyra për thithjen e duhur, prandaj këshillohet që t’i merrni me një vakt që përmban yndyrë./  /os/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.