TIRANË, 24 shtator /ATSH/ Pas 4 vitesh monitorimi GRECO, organizmi i Këshillit të Europës Kundër Korrupsionit i jep dritën jeshile shtetit shqiptar.
“Një lajm tejet inkurajues në luftën kundër korrupsionit u zyrtarizua sot në Seancën Plenare e 85-të e GRECO-s, ku u diskutua në lidhje me Shtojcën e Raportit të dytë të Përputhshmërisë, në kuadër të Raundit IV të Vlerësimit për Shqipërinë me objekt “Parandalimi i korrupsionit në lidhje me anëtarët e Parlamentit, gjyqtarët dhe prokurorët”, tha sot ministrja e Drejtësisë, Etilda Gjonaj.
Gjonaj u shpreh se, “gjatë këtyre katër viteve që Ministria e Drejtësisë është caktuar si Koordinatori Kombëtar për çështjet e korrupsionit, ky raportim shënon padyshim arritjen më të lartë të Shqipërisë në plotësimin e rekomandimeve, jo vetëm në nivel kombëtar, por edhe në rajon, pasi kemi arritur kështu të përmbushim 9 nga 10 rekomandime”.
“Teksa në Raportin e Dytë të Përputhshmërisë në lidhje me Raundin IV të Vlerësimit për Shqipërinë të miratuar në qershor 2018, GRECO vlerësoi se Shqipëria ka përmbushur 4 nga 10 rekomandime, sot jemi krenarë për progresin e dukshëm, i cili sot u vulos me njohjen nga GRECO të plotësimit edhe të 5 rekomandimeve të tjera”, u shpreh Gjonaj.
“Qëllimi i seancës së sotme plenare ishte vlerësimi i ecurisë së Shqipërisë në përmbushjen e rekomandimeve të GRECO-s mbi parandalimin e korrupsionit, miratimin dhe zbatimin efektiv të kuadrit ligjor për etikën në Kuvend, ngritjen e strukturave përgjegjëse për etikën në Këshillin e Lartë Gjyqësor dhe Këshillin e Lartë të Prokurorisë, si dhe ngritjen e Inspektorit të Lartë të Drejtësisë”, tha ministrja e Drejtësisë.
/gj.mima//a.a//r.e/
