TIRANË, 21 shtator/ 21 shtatori njihet ndryshe edhe si Dita Botërore e Alzaimerit, duke u konsideruar si një ditë në të cilën politikëbërësit, ofruesit e shërbimeve, familjarët që kanë individë të prekur dhe i gjithë opinioni publik, përqendrojnë vëmendjen në rritjen e sensibilizimit lidhur me këtë sëmundje.
Instituti i Shëndetit Publik thotë se kjo ditë synon të përqendrojë vëmendjen në aktivitetet e nevojshme mbështetëse për individët e prekur, familjarët e tyre, por edhe të parandalojë e të sensibilizojë komunitetin në përgjithësi.
Sëmundja Alzaimer është forma më e zakonshme e demencës, e gjendur në mbi 70 % të individëve me demencë ndërsa slogani i kësaj dite për vitin 2020 është ‘Le të flasim për demencën.
“Slogani i këtij viti synon që njerëzit të kuptojnë e inkurajojnë hapjen dhe diskutimin mbi demencën. Si faktorë të rrezikut për demencë përfshihen edukimi i hershëm, hipertensioni, dëmtimi dëgjimit, mbipesha, pirja e duhanit, depresioni, pasiviteti fizik, diabeti dhe izolimi shoqëror.
Individualizimi i kujdesit për pacientët me demencë, duke siguruar mbështetje për anëtarët e familjes dhe planifikimin për të ardhmen, përfshirë kujdesin në fund të jetës, janë aspekte të rëndësishme që duhet të merren parasysh’’, thonë ekspertët e ISHP-së.
“Është parë që diagnostikimi i hershëm dhe kujdesi në kohë i një sëmundje të tillë mund të përmirësojë dukshëm gjendjen e një pacienti. Kujdesi më i mirë i mundshëm mund të arrihet vetëm përmes diskutimit, destigmatizimit, diagnostikimit të hershëm dhe vendosjes së nevojave të pacientit dhe familjes së tij në radhë të parë”, shtojnë më tej ekspertët. z.tosku/j.p/
