NJU DELHI, 15 gusht /ATSH-AA/ – Kryeministri i Indisë, Narendra Modi njoftoi sot pajisjen me letërnjoftim shëndetësor të çdo qytetari dhe theksoi se vendi është i gatshëm të prodhojë në masë vaksinën antiCOVID-19, me miratimin nga shkencëtarët.
“Ky mision do të sjellë një revolucion të ri në sektorin e shëndetësisë në Indi. Të gjithëve do t’u jepet një ID shëndeti. Ajo do të përfshijë informacione në lidhje me shëndetin tuaj, vizitën e mjekut, sëmundjen, hetimin etj”, tha ai.
Njoftimi i Narendra Modit erdhi gjatë fjalimit të tij për 74-vjetorin e Ditës së Pavarësisë së Indisë, e cila po festohet në mes të shpërthimit të COVID-19, që dëshmon një përhapje masive në vend.
Kryeministri tha, gjithashtu, se në vend po vazhdon testimi i tri vaksinave antiCOVID-19 në faza të ndryshme./ /ervo/
