BERLIN, 8 korrik /ATSH-DPA/ – Partia Kristian-demokrate, CDU, e kancelares gjermane Angela Merkel ka rënë dakord për një propozim për të rritur përfaqësimin e grave brenda partisë në 50% deri në vitin 2025.
Marrëveshja për një kuotë të propozuar detyruese për gratë u arrit nga Komiteti i partisë konservatore për Çështjet Strukturore pas 11 orë bisedimesh.
Në atë që u konsiderua si një kompromis përballë rezistencës brenda partisë, marrëveshja parashikon një rritje graduale të përfaqësimit të grave në vitet e ardhshme.
Gratë do të zënë 30% të pozicioneve qeverisëse të CDU dhe vendeve parlamentare deri në vitin 2021, 40% deri në 2023 dhe 50% deri në 2025.
Propozimi i rënë dakord pritet të paraqitet në konferencën e partisë, në fillim të dhjetorit në Stuttgart, ku delegatët do të duhet të votojnë nëse do të ndërmarrin hapat e rinj.
Dokumenti i propozimit prej 16 faqesh gjithashtu përcakton plane për të njohur një grup homoseksualësh dhe lezbikesh në CDU, të njohur si LSU, si një organizatë zyrtare partie. /os/
