TIRANË, 7 maj/ATSH/ Drejtoresha e Institutit të Shëndetit Publik Albana Fico, tha se 85% e rasteve janë të shëruar nga COVID-19.
Gjatë një komunikimi online që zhvilloi Kryeministri Edi Rama me Komitetin Teknik të Ekspertëve, Fico tha se “po monitorojmë me kujdes situatën e krijuar nga COVID dhe po i kushtojmë vëmendje numrit të të shëruarve nga COVID-19, që sot e kemi mbi 85% nga 242 raste”.
Ajo tha se po rritet numri i testimeve dhe paralelisht po kryejmë një fushatë komunikimi, sensibilizimi për respektimin e të gjitha masave mbrojtëse ndaj COVID-19.
“Sot ne kemi lehtësim të lëvizjes, biznese të hapura dhe lehtësimi do të vijojë në respektim të plotë të protokolleve të mbrojtjes ndaj COVID-19, nën monitorimin e Institutit të Shëndetit Publik dhe inspektorateve të linjës”, – tha Fico.
Ajo u shpreh optimiste se nëse do të vijojmë me këto shifra inkurajuese dhe në zbatueshmëri të plotë të masave mbrojtëse ndaj COVID-19, pritet përmirësim i vazhdueshëm i situatës. /a.a//r.e/
