TIRANË, 22 mars /ATSH/-Sot është Dita Botërore e Ujit. Agjenscia e Shteteve të Bashkuara për Zhvillim Ndërkombëtar (USAID) shprehet se “është krenare që ka kontribuar në përmirësimin e sektorit të ujit në Shqipëri”.
Sipas USAID, javën e kaluar përfundoi projekti 4-vjeçar i USAID-it “Zhvillimi i Qëndrueshëm i Kapaciteteve në Sektorin e Ujit”, i zbatuar nga Shoqata Ujësjellës-Kanalizime e Shqipërisë (SHUKALB).
Në takimin përmbyllës, Përfaqësuesja e USAID/Shqipëri, Mikaela Meredith, bëri thirrje për vazhdim të bashkëpunimit mes SHUKALB dhe Ministrisë së Infrastrukturës dhe Energjisë, për forcimin e kapaciteteve teknike në këtë sektor. Qëllimi i projektit ishte krijimi i një platforme institucionale trainimi, e ndjekur nga certifikimi, çka siguron mbështetjen e zhvillimit të kapaciteteve edhe në të ardhmen. Duke u përqendruar në rritjen e ekspertizës në vend, ky partneritet shpejton Rrugëtimin e Shqipërisë drejt Zhvillimit të Pavarur.
e.xh/
