ROMË, 20 mars /ATSH-DPA/ – Kreu i Programit Botëror të Ushqimit i Organizatës së Kombeve të Bashkuara (WFP), David Beasley, njoftoi se kishte rezultuar pozitiv me koronavirusin e ri.
“Më konfirmuan se, pas testimit, rezultova pozitiv me virusin COVID-19”, tha ai në një deklaratë.
“Fillova të mos ndihesha mirë gjatë fundjavës së kaluar pasi u ktheva në shtëpinë time në SHBA nga një vizitë zyrtare në Kanada dhe mora vendimin për të kaluar në karantinë, pesë ditë më parë”, shtoi ai.
Beasley, 63 vjeç, ishte guvernatori republikan i shtetit amerikan të Karolinës së Jugut nga 1995 deri në 1999.
Ai ka udhëhequr WFP me qendër në Romë, agjencinë e ndihmës ushqimore të OKB, që nga viti 2017.
Beasley theksoi se është duke punuar me ekipin e WFP për të gjetur këdo që mund të ketë qenë në kontakt me të, kur ai nuk kishte qenë në dijeni të infeksionit./ a.jor.
