TIRANË, 1 shkurt/ATSH/ Organizata Botërore e Shëndetësisë rekomandon marrjen e disa masave kryesore për parandalimin e infeksionit nga koronavirusi.
Ministrja e Shëndetësisë dhe Mbrojtjes Sociale, Ogerta Manastirliu shprehet se
me disa gjeste të thjeshta, mund të mbroni veten dhe të tjerët nga viruset e rrezikshme si koronavirusi.
“Lani shpesh duart me sapun ose pastrojini ato duke i fërkuar me pastrues me bazë alkooli. Kur kolliteni apo tështini, mbuloni gojën dhe hundën me shami letre. Hidheni menjëherë shaminë e letrës në koshin e plehrave dhe pastaj lani duart. Menjanoni kontaktet e ngushta me këdo që ka temperaturë apo kollë”, rekomandon OBSH.
Ndërkaq, ministrja u bën apel qytetarëve të cilët mund të kenë udhëtuar së fundmi në Kinë, që nëse ata kanë temperaturë, kollë apo vështirësi në frymëmarrje, të telefonojnë urgjencën kombëtare 127. z.tosku/ /a.a/
