TIRANË, 11 tetor/ATSH/ – Zëvendëskryetarja e Kuvendit, Vasilika Hysi, priti sot Chantal Nicod, në cilësinë e shefes të qeverisjes dhe sektorit të shëndetit në Ambasadën e Zvicrës në Shqipëri. Gjatë takimit Hysi dhe Nicod diskutuan për mbarëvajtjen e punës në kuadër të projektit PACEP si dhe për hapat e ndërmarrë në zbatimin e tij.
Hysi prezantoi hapat e deritanishëm në lidhje me hartimin e Planit strategjik të Kuvendit, konsultimet e zhvilluara, fuqizimin e kërkimit parlamentar dhe vlerësoi rëndësinë e rritjes së kapaciteteve të burimeve njerëzore të Kuvendit dhe asistencën për deputetët për monitorimin e zbatimit të legjislacionit nga këndvështrimi i ndjeshmërisë gjinore. Roli dhe funksionimi efektiv i Aleancës së Grave Deputete në promovimin dhe mbrojtjen e të drejtave të grave, në rritjen e pjesëmarrjes së tyre në vendimmarrje ishte gjithashtu një çështje me interes që u diskutua në takim.
Konstituimi i Rrjetit për zbatimin e Strategjisë së Edukimit Ligjor të Publikut, i kryer një ditë më parë në Kuvend, u vlerësua si një mundësi e mirë për të rritur informimin e qytetarëve për ligjin dhe gëzimin e të drejtave të tyre, çështje që është në vëmendje edhe të projektit PACEP, që po zbatohet me mbështetjen e qeverisë zvicerane.
Hysi dhe Nicod shprehën angazhimin reciprok për të forcuar bashkëpunimin në kuadër të projektit PACEP, si edhe në aspekte të tjera. /a.sh/r.e/
