TIRANË, 21 gusht/ATSH/ Ministria e Financave dhe Ekonomisë, reagoi sot pas pretendimeve të Partisë Demokratike, dega Shkodër, për bllokim të fondeve të kësaj bashkie për shërbime dhe investime.
“Lidhur me situatën e krijuar në bashkinë Shkodër, ju bëjmë me dije, se strukturat e Ministrisë së Financave dhe Ekonomisë, i kanë ndjekur nga afër këto procedura në përputhje më legjislacionin në fuqi”, thuhet në deklaratë.
Për sa i përket kësaj situate, Ministria e Financave dhe Ekonomisë sqaron se, “ditën e djeshme janë ekzekutuar nga Dega e Thesarit, Shkodër, të gjitha pagesat dhe urdhërpagesat e depozituara nga Bashkia Shkodër brenda orarit zyrtar dhe sipas gjithë procedurave ligjore”.
“Për këtë Ministria e Financave dhe Ekonomisë, Drejtoria e Përgjithshme e Thesarit dhe Dega e Thesarit, Shkodër, ka gjithë dokumentacionin e nevojshëm për sa më sipër. Kështu që bazuar mbi të gjitha këto arsyetime që paraqitëm më lart, Ministria e Financave dhe Ekonomisë ju bën me dije, se ky dikaster është në funksion të zbatimit të ligjit për të gjithë qytetarët njësoj pa dallime”, përfundon deklarata./m.m/
