TIRANË, 31 korrik/ATSH/ Gjykata Lezhë vërtetoi sot mandatin për Kryetarin e Bashkisë, Pjerin Ndreu, ndërsa betimi i tij pritet të bëhet në datën 14 gusht.
“Fundi i procedurave ligjore pason me betimin më datën 14. E ardhmja padiskutim do të jetë një histori e re në një shndërrim radikal të situatës në drejtimin e duhur. Falënderoj të gjithë ata që besuan, votuan, por edhe ata që e helmuan, më anatemuan me zhargone fyese, dhe kundërshtarët politikë që natyrshëm nuk mund të ishin pro meje”, u shpreh sot Ndreu.
Ai garantoi të gjithë se bashkia e nesërme është derëhapur për këdo pavarësisht nga investimi elektoral në mënyrën e duhur dhe të paduhur. Pushteti do jetë shërbim dhe gjithkush do bindet se fjalët nuk janë thënë në erë, por do bëhen realitet !
Faleminderit dhe mirënjohje gjithë socialistëve që besuan te unë. Obligim për t’i përfaqësuar denjësisht”, tha ai./m.m/
