TIRANË, 13 qershor/ATSH/ – Agjencia Kombëtare e Kërkimit Shkencor dhe Inovacionit ka çelur aplikimet për projekte infrastrukturore të kërkimit shkencorë në kuadër të “Paktit për Universitetin”.
Fakulteti i Histori-Filologjisë në Universitetin e Tiranës bën të ditur se në këtë thirrje do të mbështeten financiarisht projektpropozime nga institucionet e arsimit të lartë, të cilat plotësojnë komponentët e kërkimit shkencor dhe zhvillimit të infrastrukturës kërkimore akademike (laboratorike).
Në projekte infrastrukturore të kërkimit shkencorë përfshihen pajisje apo investime laboratorike, sisteme kompjuterike, informatike etj.
“Projekt propozimet inovative në fushat e teknologjisë së informacionit, inxhinierike, mjekësore, bujqësore dhe ato të shkencave të natyrës si dhe ato projekt propozime të cilat plotësojnë kushtet e VKM nr.188, datë 13.03.2019, “Për ofrimin nga institucionet publike të arsimit të lartë të shërbimeve, në përputhje me veprimtarinë e tyre, për institucionet e qeverisjes vendore dhe institucionet në varësi të tyre”, janë prioritare”, thuhet në thirrjen e çelur.
Projektet e propozuara synojnë arritjen e objektivave të kërkimeve shkencore, dhe angazhimet e “Paktit për Universitetin”. Gjithashtu do të vlerësohet edhe kontributi i këtyre projekteve në përputhje me politikat, strategjitë, misionet dhe vizionet e institucione të arsimit të lartë. /z.tosku/ /a.g/
