Banka e Shqipërisë, plan masash për rritjen e cilësisë së kreditimit

Sejko, apel bankave të zgjerojnë gamën e produkteve të kreditimit si dhe të financojnë sektorë të rinj të ekonomisë shqiptare, si bujqësia dhe biznese të tjera inovative në fushën e teknologjisë

TIRANË, 29 maj /ATSH/ – “Sektori bankar si kontribues i rëndësishëm në zhvillimin ekonomik të vendit”, ishte tema e takimit që u zhvillua sot, në ambientet e Bankës Shqipërisë, me pjesëmarrjen e Guvernatorit të BSH-së, Gent Sejko, përfaqësuesve  ekzekutivë më të lartë të bankave tregtare, Fondit Monetar Ndërkombëtar dhe Bankës Botërore.

Në fjalës së tij, guvernatori Sejko u shpreh se nëpërmjet këtij takimi synohet të arrihet hartimi i një plani konkret masash për përmirësimin e sasisë dhe cilësisë së kreditimit, si dhe të zgjerohet gama e produkteve financiare.

Duke u ndalur në ecurinë e sektorit bankar, guvernatori vlerësoi kontributin e rëndësishëm që sektori bankar jep në zhvillimin ekonomik të vendit, ku vëllimi i kursimeve financiare të administruara nga sektori bankar zë rreth 70% të PBB-së, ndërsa vëllimi i kredisë së dhënë prej tij është rreth 35% të PBB-së.

Në gjykimin e Bankës së Shqipërisë, sektori bankar është shtylla kryesore e sistemit financiar dhe njëkohësisht ndër segmentet më të zhvilluara dhe profesionale të ekonomisë. Konsolidimi i sektorit bankar si dhe reduktimi i vazhdueshëm i rrezikut të kredisë pritet të sjellin një rritje të procesit të kreditimit në vend. Për materializimin e këtij objektivi, Guvernatori Sejko kërkoi nga përfaqësuesit e sektorit bankar që të reflektojnë një përqasje më aktive në përmbushjen e misionin të tyre kryesor, atë të kreditimit të shëndetshëm të ekonomisë.

Sejko i bëri apel bankave të ndërmarrin hapat e duhura për të zgjeruar gamën e produkteve të kreditimit si dhe të financojë sektorë të rinj të ekonomisë shqiptare, si bujqësia dhe biznese të tjera inovative në fushën e teknologjisë së informacionit.

“Është detyrë e sektorit bankar që të plotësojë gamën e produkteve financiare me instrumente derivate të mbrojtjes ndaj rrezikut të kursit të këmbimit për atë kategori kredimarrësish që janë të ekspozuar ndaj tij”, – theksoi Guvernatori.

Në mbyllje të fjalës së tij, guvernatori Sejko u shpreh se një tjetër rol i rëndësishëm i sektorit bankar është sigurimi i shërbimeve të pagesave në ekonomi. Në këtë aspekt, vijoi Sejko, Banka e Shqipërisë ka hartuar projektligjin “Për shërbimet e pagesave”, me miratimin e të cilit do të krijohen kushtet për promovimin e risive teknologjike, duke nxitur prezantimin e instrumenteve më efikase, më të shpejta dhe me kosto më të ulët, të cilat do të rrisin konkurrencën në treg, si dhe do të sigurojnë transparencë dhe mbi të gjitha mbrojtje për konsumatorin.

Nga ana e tij, kryetari i Shoqatës Shqiptare të Bankave, Silvio Pedrazzi u shpreh se sektori bankar paraqitet i qëndrueshëm dhe likuid, një parakusht i plotë ky për kreditimin cilësor të ekonomisë. Pedrazzi u bëri thirrje bizneseve që të paraqesin projekte të reja për financim, projekte të cilat gjenerojnë rritje të punësimit në ekonomi. Në përfundim, ai shprehu angazhimin e sektorit bankar për të kontribuuar në zhvillimin e mëtejshëm ekonomik të vendit.

Më tej, takimi vijoi me dy prezantime specifike “A mund të bëhet më shumë për rritjen e kreditimit dhe si?” dhe “Modernizimi i sistemeve të pagesave”, të cilat u ndoqën nga diskutime aktive të të pranishmëve mbi temat e prezantuara dhe çështjet e ngritura gjatë prezantimeve.

Në mbyllje të tij, takimi u vlerësua shumë frytdhënës nga të gjithë pjesëmarrësit, të cilët shprehën angazhimin e tyre për ta çuar më tej këtë përpjekje të përbashkët, duke bashkëpunuar për hartimin e një plani masash bazuar mbi konkluzionet e arritura në këtë takim.

e.xh/j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.