PRISHTINË, 27 maj /ATSH/ – Presidenti i Kosovës, Hashim Thaçi, sot priti zv.presidentin e Atlantic Council, Damon Wilson, së bashku me një delegacion nga Senati dhe Kongresi Amerikan.
Presidenti Thaçi e falënderoi zv.presidentin Wilson për kontributin e vazhdueshëm të Atlantic Council në Kosovë për forcimin e strukturave të sigurisë.
“Në 20 vjetorin e çlirimit të Kosovës, populli dhe shteti i Kosovës janë mirënjohës përjetësisht për rolin përcaktues të SHBA-së në lirinë dhe pavarësinë e Kosovës”, tha ai.
Kreu i shtetit dhe delegacioni amerikan biseduan edhe për procesin e tranzicionit të Forcës së Sigurisë së Kosovës dhe anëtarësimin e Kosovës, fillimisht në Partneritetin për Paqe, më pas edhe në NATO.
Në këtë takim është biseduar edhe për dialogun Kosovë-Serbi dhe domosdoshmërinë e shfrytëzimit të momentumit për arritjen e një marrëveshjeje gjithëpërfshirëse dhe ligjërisht obliguese.
“Mungesa e një marrëveshje ndërmjet Kosovës dhe Serbisë mund të ketë pasoja për sigurinë dhe stabilitetin në rajon dhe i hapë rrugë elementeve antieuropiane”, tha Presidenti Thaçi.
Nga ana tjetër, zëvendëspresidenti Damon Wilson rikonfirmoi angazhimin e Atlantic Council për Kosovën.
Thaçi tha se bashkë me SHBA-në do të vazhdojnë angazhimin maksimal për të ruajtur dhe zhvilluar paqen dhe sigurinë në Kosovë dhe rajon. /KosovaPress/j.p/
