TIRANË, 22 mars/ATSH/ – Kryeministri i Kosovës, Ramush Haradinaj, mbështet mbylljen dhe pezullimin e kazinove dhe lojërave të fatit në vend.
Haradinaj ka përshëndetur propozim-rezolutën e 49 deputetëve të Kuvendit lidhur me këtë çështje, ndërsa ka bërë të ditur se ka kërkuar fillimin e procedurave të nevojshme brenda Ekzekutivit.
“Ditë më parë, si Kryeministër i vendit kam kërkuar inicimin e procedurave të nevojshme brenda ekzekutivit, të cilat do të rezultonin me mbylljen dhe pezullimin e aktiviteteve të kazinove dhe lojërave të fatit. Përballë kësaj gjendjeje, ne nuk do të lejojmë që këto vende të jenë arenë e krimit dhe të marrin jetë njerëzish. Ekzekutivi dhe organet e sigurisë, tashmë janë mobilizuar për të reaguar dhe parandaluar degradimin e mëtejmë”, shprehet Haradinaj.
/KosovaPress/e.caushi/
