TIRANË, 20 mars /ATSH/ – Dajna Sorensen, zv/ministre e Financave dhe Ekonomisë, u shpreh se informaliteti në ekonominë e vendit, po ndjek trajektoren e rënies progresive.
Duke iu referuar raportit të publikuar një ditë më parë nga Banka Botërore mbi tregun e punës në vendet e Ballkanit Perëndimor, Sorensen tha sot në një prononcim për ATSH-në, se “raporti në vetvete analizon faktin se niveli i informalitetit në ekonominë shqiptare është i lartë në nivelin 38%, por krahasuar me vitin 2014, raporti i BB citon se informaliteti është reduktuar nga 50% në 36% aktualisht”.
“Qeveria është e angazhuar në luftën kundër informalitetit dhe po punon fort në disa drejtime. Në bashkërendim edhe me instuticionet e linjës, por edhe me faktorët ndërkombëtarë, po hartohen masa për reduktimin e informalitetit, që përkthehet në rritje të ekonomisë së vendit dhe zhvillim të qëndrueshëm”, u shpreh ajo, ndërsa theksoi se qeveria po punon mbi bazën e masave konkrete në tre drejtime për reduktimin e informalitetit që përfshijnë: Administratën Tatimore, Sigurimet Shoqërore dhe Inspektoriatin e Punës. /e.xh/j.p/
