TIRANË, 5 mars /ATSH/- Instituti i Statistikave (INSTAT) bën të ditur se, indeksi i çmimeve të prodhimit u rrit lehtë në tremujorin e fundit të vitit të kaluar.
INSTAT raportoi se në tremujorin e katërt të vitit 2018, indeksi i çmimeve të prodhimit u rritur me 0,5%, në krahasim me tremujorin e katërt 2017 dhe shënoi ulje me 0,6%, krahasuar me tremujorin e tretë 2018.
Indeksi i çmimeve të prodhimit mat çmimet me të cilin ato hidhen në treg nga prodhuesit, ndaj jep një orientim për rritjen e çmimeve të konsumit në një të ardhme të afërt. Nëse prodhuesit rrisin çmimet, ndodh që kjo rritje të përcillet edhe në çmimet me të cilët konsumatorët i blejnë mallrat me pakicë.
Sipas INSTAT, për këtë periudhë rritjen më të madhe e kanë shënuar çmimet e prodhimit në seksionin “Industri nxjerrëse” me 4,3%. Brenda kësaj industrie vihet re rritja e çmimeve të prodhimit të produkteve në nxjerrjen e naftës bruto dhe gazit natyror me 6,5%.
Në tremujorin e katërt 2018, çmimet e prodhimit në aktivitetet e “Industrisë përpunuese” kanë shënuar ulje me 1,5%, krahasuar me tremujorin e katërt 2017.
Ndikimin kryesor në këtë ulje e kanë dhënë çmimet e prodhimit të produkteve në aktivitetin “Prodhimi i produkteve minerale jo metalike” me 1,3%,“Përpunimi i produkteve ushqimore” me 1,9%, “Metalurgjia” me 3,1% dhe “Konfeksionimi i veshjeve” me 1,5%. Indeksi i çmimeve të prodhimit për produktet vendase arriti 101,2, duke u rritur me 1,0%, krahasuar me tremujorin e katërt të vitit 2017.
Indeksi i çmimeve të eksportit arriti 106,6, duke u ulur me 0,8%, krahasuar me të njëjtën periudhë të vitit të mëparshëm.
Indeksi i çmimeve të prodhimit, në tremujorin e katërt 2018, shënoi ulje me 0,6%, krahasuar me tremujorin e tretë 2018. Çmimet e prodhimit, në seksionin ”Industri Nxjerrëse” shënuan ulje me 6,0%, krahasuar me tremujorin e tretë 2018.
Çmimet e prodhimit në aktivitetin “Nxjerrja e naftës bruto dhe gazit natyror” janë ulur me 10,4%. Çmimet e prodhimit në seksionin “Industri përpunuese” nuk kanë shënuar ndryshim, krahasuar me tremujorin e mëparshëm.
Në këtë industri, çmimet e prodhimit të produkteve në aktivitetin “Prodhimi i produkteve minerale jo metalike” dhe “Përpunimi i produkteve ushqimore” janë rritur respektivisht me 0,2% me 0,6%.
Ndërsa çmimet e prodhimit në aktivitetin “Metalurgjia” janë ulur me 0,4% Krahasuar me tremujorin e tretë të vitit 2018, indeksi i çmimeve të prodhimit për produktet vendase ka shënuar ulje me 0,1%. Në këtë ulje, ndikimin kryesor e kanë dhënë çmimet e prodhimit të produkteve në seksionin “Industri Nxjerrëse” me 3,2%.
Çmimet e prodhimit të produkteve për eksport kanë shënuar ulje me 2,1%, krahasuar me tremujorin e mëparshëm. Ndikimin kryesor në këtë ulje e kanë dhënë çmimet e prodhimit të produkteve në seksionin “Industri Nxjerrëse” me 8,1 %. e.xh/e.caushi/
