TIRANË, 5 shkurt /ATSH – I. Vata/ – Kryetari i Partisë Demokratike, Lulzim Basha, priti sot në Tiranë, kryetarin e Vetëvendosjes, Albin Kurti, me të cilin theksoi se në dialogun Serbi- Kosovë, domosdoshmëri është moscenimi territorial i Kosovës.
Në bashkëbisedim, kreu i opozitës Basha dhe lideri i Vetëvendosjes, Kurti ndanë të njëjtin mendim mbi rëndësinë që ka dialogu mes Kosovës dhe Serbisë, domosdoshmërinë e moscenimit të integritetit territorial dhe shtetëror të Republikës së Kosovës dhe unitetin politik me të cilin Kosova duhet të përfaqësohet në këtë dialog.
Po ashtu, lideri i opozitës shqiptare dhe lideri i Vetëvendosjes shprehën vendosmërinë për t’u qëndruar vlerave dhe standardeve perëndimore, si e vetmja garanci në mbrojtje të interesit më të mirë të Shqipërisë dhe Kosovës. /j.p/
