PRISHTINË, 21 dhjetor /ATSH/ – Ministri i Punëve të Brendshme, Ekrem Mustafa priti në takim ambasadorin e Shteteve të Bashkuara të Amerikës, Philip Kosnett.
Sipas njoftimit për media nga MPB, në këtë takim, Mustafa e njoftoi ambasadorin amerikan për situatën e përgjithshme të sigurisë në Kosovë.
Gjatë këtij takimi u diskutua për marrëdhëniet dhe bashkëpunimin në mes SHBA-ve dhe Republikës së Kosovës.
Mustafa e vlerësoi lart mbështetjen që qeveria amerikane ka dhënë për sektorin e sigurisë, veçanërisht për përkrahjen në fuqizimin e agjencive të sigurisë në kuadër të Ministrisë së Punëve të Brendshme dhe kërkoi që kjo përkrahje të vazhdojë edhe në të ardhmen.
Ndërsa, ambasadori amerikan, Philip Kosnett tha se vendi i tij është i përkushtuar për bashkëpunimin me Republikën e Kosovës, duke shtuar se ndjehet shumë i gëzuar që do të shërbejë në Kosovë.
Ai theksoi se bashkëpunimi dhe përkrahja amerikane për Kosovën, e në veçanti për institucionet e rendit dhe ligjit, nuk do të mungojë. /KosovaPress//e.malaj/j.p/
