TIRANË, 13 dhjetor/ATSH-Maela Marini/ Ligji i Arsimit të Lartë i jep fuqinë dhe kompetencat e plota universiteteve sa i takon tarifave.
Në një takim me rektorët e dekanët, Kryeministri Edi Rama deklaroi sot se “tarifat janë përgjegjësi e universiteteve për t’i propozuar dhe përgjegjësi e qeverisë për t’i pranuar”.
“Si ka mundësi që sot e gjithë ditën studentët nuk e dinë fare se çfarë janë tarifat, sa është kostoja e secilit prej tyre, nuk e dinë se 75% e kostos e mbulon buxheti i shtetit dhe se nga burojnë tarifat. Çfarë i kushton universiteteve dhe secilit prej jush që senati akademik të funksionojë me fuqinë dhe kompetencat e plota që i jep ligji për Arsimin e Lartë e thotë shprehimisht që i takon senatit, që jo vetëm të ketë dijeni, por edhe vendimmarrje mbi këto tema”, – tha Rama.
Ligji i ri për Arsimin e Lartë, sipas tij, i ka dhënë një hapësirë të re autonomie universitetit.
“Janë në të drejtën e tyre shumë studentë dhe qytetarë që të mos e kuptojnë kur unë them se është e pamundur për mua dhe qeverinë që t’i zgjidh nga lart poshtë disa çështje, sepse universiteti ka autonomi”, tha ai.
Kryeministri u kujtoi rektorëve e dekanëve se “tarifa e provimeve të mbartura është një tarifë e kërkuar nga Universitetet dhe këtë as nuk mund ta mohojnë dhe as mund të bëjnë sikur e kanë harruar në momentin që ajo bëhet problem”.
“Përpara se të hynim në këtë fazë, protesta nisi me një shkak konkret lidhur me një tarifë. Tarifa e provimeve të mbartura është një tarifë e kërkuar nga ju dhe ju këtë as nuk mund ta mohoni dhe as mund të bëni sikur e keni harruar në momentin që ajo bëhet problem”-tha Rama./r.e/
