TIRANË, 12 qershor/ATSH/ – Gjatë ditës së sotme vijuan punimet e ndërhyrjes emergjente për riparimin e shtresave të asfaltit në aksin Qafë-Kashar-Durrës dhe Durrës-Qafë-Kashar në segmentin Vorë-Maminas në drejtimin Tiranë-Durrës.
Drejtori i Autoritetit Rrugor Shqiptar, Afrim Qendro në një prononcim për ATSH-në bëri të ditur se në bashkëpunim me policinë rrugore është hartuar një plan operacional ndërhyrjeje dhe devijimi të trafikut për të shmangur bllokimin e qarkullimit dhe garantuar mbarëvajtjen e punës në terren.
Sipas tij, lëvizja e automjeteve në drejtimin Tiranë–Durrës devijohet te karburant “Kastrati” në Vorë në rrugën dytësore Vorë–Marikaj–Maminas (te nënkalimi i dytë i Vorës).
Automjetet, theksoi Qendro, mund të përdorin sërish autostradën nga Maminasi në drejtim të Durrësit te mbikalimi i Maminasit.
Lëvizja e mjeteve të tonazhit të rëndë të cilat lëvizin nga Veriu në drejtim të Jugut, vuri në dukje ai, do të devijohen në Fushë-Krujë në drejtim të Kamzës, duke shfrytëzuar rrugët alternative Tiranë–Unaza e re–Kombinat–Ndroq–Durrës ose Tiranë–Unaza e re–Elbasan–Rrogozhinë.
Ndërkohë, Qendro bën të ditur se drejtimi nga Durrësi për në Tiranë është i hapur për lëvizjen e automjeteve, por dalja për automjetet te mbikalimi në Marikaj për në rrugën dytësore do të jetë i bllokuar.
Po ashtu edhe dalja te mbikalimi i Vorës në drejtim të veriut do të jetë e mbyllur për mjetet e rënda që lëvizin në drejtimin nga Durrësi drejt veriut. Këto mjete do të shfrytëzojnë mbikalimin te “Casa Italia” në drejtim të Kamzës dhe në vijim.
“Në mënyrë të veçantë drejtuesit e mjeteve që përdorin segmentin Tiranë-Durrës dhe kthim duhet të përpiqen të zgjedhin drejtime alternative sipas udhëzimeve që do të jepen në vazhdimësi nga autoriteti rrugor dhe policia rrugore”, – deklaroi kreu i autoritetit rrugor.
Ai siguroi se punonjësit e këtyre dy institucioneve dhe firmave të mirëmbajtjes do të jenë me njësi të përqendruara në terren për mbarëvajtjen e ndërhyrjes dhe orientimin e trafikut.
Zbatimi i rregullave të qarkullimit rrugor, sinjalistikës provizore të vendosur në segmentet ku do të punohet dhe udhëzimet e policisë, sipas Qendros mbeten thelbësore për vijimin e punës.
Pas përfundimit të ndërhyrjes në segmentin Vorë-Maminas do të fillojë ndërhyrja në segmentet e tjera për të cilat ARRSH dhe Policia e Qarkullimit Rrugor do të përditësojnë skemat e lëvizjes dhe do informojnë opinionin publik. /a.gjonaj//j.p/
