PRISHTINË, 7 Maj/ATSH/.- Agjencia për Mbrojtjen e Mjedisit të Kosovës njoftoi sot se Shpella e Gadimes është e hapur për vizitorët, pasi u rregullua defekti në sistemin elektrik të ndriçimit në këtë monument të natyrës.
Përmes një njoftimi për shtyp, Agjencia për Mbrojtjen e Mjedisit të Kosovës, i kërkon falje të gjithë vizitorëve që kanë planifikuar të realizojnë vizita gjatë kësaj periudhe kohore dhe i njofton që sot e tutje Shpella e Gadimes do të jetë e hapur dhe e sigurt për të mirëpritur vizitorët e saj.
“Kërkojmë mirëkuptim nga të gjithë vizitorët për mbylljen e përkohshme të shpellës dhe njëherësh ju bëjmë me dije që kushtet brenda shpellës janë specifike dhe kërkojnë mirëmbajte të vazhdueshme të rrjetit elektrik në shpellë, prandaj mbyllja e përkohshme e shpellës në këto raste është e paevitueshme”, thuhet në njoftimin e Agjencisë.
Shpella e Gadimes në Lipjan, është një ndër më të bukurat jo vetëm në Kosovë, por edhe në Ballkan e më gjerë. Ajo ka një moshë 80 milionë vjeçare dhe është ndër më të vjetrat në botë. Me një gjatësi prej 1500 metra, ajo ndahet në 3 nivele: niveli nënujor, niveli i mesëm që është për vizitorë, dhe niveli i sipërm që është zbuluar, por që është i pakalueshëm për vizitorët.
Gjatë një viti kjo shpellë vizitohet nga 30 mijë turistë vendas e të huaj, të cilët mbeten të mahnitur nga forma e kristaleve që ndodhen brenda kësaj shpelle./KosovaPress/k.s/
