PEKIN, 22 gusht /ATSH-AA/ – Dy astronautë kinezë bënë ecjen e dytë hapësinore, njoftoi agjencia hapësinore e vendit aziatik.
”Astronautët Nie Haisheng dhe Liu Boming u larguan nga stacioni i tyre hapësinor ”Tianhe”, tha Agjencia Kineze e Hapësirës (CMSA) në një deklaratë.
Kjo ishte hera e dytë në dy muajt e fundit që astronautët kinezë kanë zhvilluar aktivitete jashtë anijes kozmike.
”Astronauti i tretë, Tang Hongbo, mbështeti ekipin nga brenda stacionit hapësinor gjatë detyrës së tyre”, thuhej në deklaratë.
”Ata përfunduan instalimin e platformës së punës jashtë automjetit hapësinor në krahun mekanik. Ata do të vazhdojnë të punojnë së bashku për të instaluar pajisje të tjera relevante jashtë automjetit hapësinor me ndihmën e krahut mekanik”, tha CMSA.
Tre astronautët kanë qenë në hapësirë që nga qershori dhe do të kthehen në Tokë nga mesi i shtatorit.
Ecja e parë në hapësirë e ekuipazhit u bë nga Liu dhe Tang më 4 korrik./ a.jor.
