TIRANË, 5 prill/ATSH/- Zv.ministri i Brendshëm, Julian Hodaj ka theksuar të premten gjatë një interviste, se janë tri arsye kryesore që çuan në ngritjen e “Illyrian Guard” sh.a.
Sipas tij arsyet janë për të ofruar një standard të ri cilësie në tregun e sigurisë dhe rendit publik; për të kursyer nga buxheti i shtetit shuma të konsiderueshme që shkojnë sot për ruajtjen dhe sigurinë fizike nga institucionet shtetërore; e treta, jo më pak e rëndësishme, ofron një mundësi të mirë freskimi për personelin e Policisë së Shtetit.
“Për të krijuar këtë shoqëri do të marrim eksperiencat më të mira që ka sot në Europë apo në botë. Dhe nuk është një risi që kompani tregtare, të zotëruara nga shteti, të operojnë në këto lloj fushash”, tha Hodaj.
“Kemi shembuj të tillë të suksesshëm në Austri, në Gjermani, në Francë, në Itali, ku mjaft kompani shtetërore janë lider në tregjet përkatëse dhe duke qenë lider në tregjet përkatës jo vetëm që gjenerojnë të ardhura të konsiderueshme edhe për buxhetin e shtetit, por kanë edhe lirinë për të kërkuar dhe zhvilluar teknologji të reja, në mbështetje gjithmonë të atyre që janë qëllimet e tyre. Pra shërbimet, me çmime të arsyeshme, risi teknologjike për fushën e sigurisë dhe rendit publik”, vijoi zv.ministri i Brendshëm.
“Kjo kompani, do të organizohet me disa departamente në varësi të shërbimeve që do të japë. Nuk është thjesht një shoqëri që ofron shërbim ruajtjeje dhe sigurie fizike, pra nuk është thjesht një ‘SHPSF’. Patjetër që do të operojë edhe në atë treg, sidomos me institucionet shtetërore. Por edhe një komponent tjetër mjaft i rëndësishëm është kërkimi teknologjik dhe fusha e teknologjisë së informacionit. Pra, ajo që ne kemi si shtysë sot që është modernizimi i strukturave të Ministrisë së Brendshme”, tha Hodaj.
“Avantazhet në krahasim me një organ shtetëror janë sepse duke qenë një shoqëri tregtare, ka një organizim dinamik”, sqaroi ai, duke vënë në dukje se nuk është e kushtëzuar nga ato skema që sot ndjekin agjencitë shtetërore apo institucionet shtetërore dhe i përshtatet shumë më lehtë tregut. “Në fushën e rendit dhe sigurisë publike ka një avantazh tjetër në raport me kompanitë e tjera, sepse mund të shfrytëzojë gjithë eksperiencën dhe “know how-n” e Policisë së Shtetit. Pra është një vlerë e shtuar nga ana tjetër”, vijoi zv.ministri.
Sipas tij, burimi kryesor i rekrutimit të punonjësve do të jetë Policia e Shtetit. “Në Policinë e Shtetit ka shumë njerëz me eksperiencë, të cilët për një arsye ose për një tjetër, nuk kanë pasur atë ecuri në karrierë. Flasim për ata që kanë po themi 20-25 vite eksperiencë në Policinë e Shtetit. Mund të jetë një mundësi shumë e mirë për ta që të punojnë për një entitet që garanton edhe kushte ndoshta të mira pune dhe duke vazhduar pak a shumë të punojnë në të njëjtin profil”, tha Hodaj.
“Ruajtja dhe siguria fizike është vetëm një nga fushat ku mund të operojë kjo shoqëri”, shtoi Hodaj. Duke qenë shoqëri tregtare mund të operojë në të gjitha fushat që e gjykon të arsyeshme dhe në të gjitha ato fusha, të cilat përveçse mund të krijojnë të ardhura, mund të jenë edhe me interes për zhvillimin e mëtejshëm.
“Ajo që ne mendojmë është që kjo shoqëri do jetë një element kyç përsa i përket modernizimit të Policisë së Shtetit apo të strukturave të tjera të Ministrisë së Brendshme. Që do të thotë, duke qenë një entitet privat, ka gjithë lirinë që të ushtrojë veprimtarinë në fushën e kërkimit dhe zhvillimit të teknologjive. Ne besojmë fort që në këtë pikë do të jetë një ndihmë e madhe për të gjithë institucionet e Ministrisë së Brendshme”, përfundoi zv.ministri Brendshëm, Julian Hodaj.
Qeveria miratoi të enjten vendimin për të krijuar shoqërinë “Illyrian Guard”, e cila do të jetë me kapital 100% shtetëror. /j.p/
