VATIKAN, 4 mars /ATSH-DPA/ – Vatikani do të hapë arkivat për Luftën e Dytë Botërore, kur në krye të Kishës Katolike ishte papa Piu XII, i cili është akuzuar për dështim në përballjen me nazistët lidhur me çështjen e Holokaustit.
”Kisha nuk ka frikë nga historia, përkundrazi”, deklaroi sot papa Françesku në një fjalim përpara punonjësve të Arkivit Sekret të Vatiikanit.
Arkivat do të hapen më 2 mars 2020, në 81-vjetorin e zgjedhjes së papa Piut XII.
”Kërkuesit do ta gjykojnë këtë papë nga këndvështrimi i duhur. Do të gjykojnë diplomacinë e tij të fshehur, por aktive në këtë periudhë të errët të historisë”, shprehu shpresën papa Françesku.
Papa Piu XII, në fron gjatë viteve 1939-58, është akuzuar se ka treguar indiferencë ndaj masakrave naziste kundër hebrenjve dhe për dështim për të folur hapur kundër Hitlerit.
Mbrojtësit e tij thonë se papa Piu XII punoi fshehtas duke u përpjekur të shpëtonte të persekutuarit nga nazistët duke hapur dyert e manastireve, konventave dhe të infrastrukturës tjetër fetare për të shpëtuar hebrenjtë./ a.jor.
