TIRANË, 2 tetor /ATSH – I. Vata/ – Bashkia Bulqizë ka marrë pjesë në seminarin dy ditor që zhvillohet në Tiranë në kuadër të projektit “Bashkitë për në Europë”
“Vazhdon dita e dytë e seminarit, që zhvillohet në kuadër të Projektit “Bashkitë për në Europë”. Tashmë, ky nuk është vetëm një projekt. Më shumë se kaq, është një proces që synon të shtrihet nga niveli qendror në nivel vendor, pra në komunitet”, shprehet bashkia.
Po ashtu thuhet se ndërkohë do të vazhdojë puna edhe për strukturimin e këtij procesi, nëpërmjet krijimit të Njësive për Integrimin Europian.
Në kuadër të integrimit të Shqipërisë në Bashkimin Europian, vazhdon puna për ngritjen e njësive për Integrimin në BE.
Këto struktura do të kenë një sërë funksionesh në kuadër të informimit dhe të zbatimit të një sërë aktivitetesh për qytetarët që kanë si qëllim procesin europian.
Nëpërmjet këtyre strukturave do të bëhet informimi në mënyrë periodike i publikut dhe i grupeve të tjera të interesit për procesin e integrimit evropian, për politikat e BE-së dhe mundësitë për përfitim nga asistenca e Bashkimit Europian, nëpërmjet këndeve të Bashkimit Europian, të cilat krijohen dhe funksionojnë brenda bashkisë. /j.p/
