TIRANË, 28 shkurt/ATSH/ “Karnavalet” e Inva Mulës shitën të gjitha biletat e katër netëve shfaqje në TKOB. Produksioni i ri e mbushi sallën plot, u pëlqye nga publiku dhe ndërkohë është njoftuar se pa rënë jehona që pati në Tiranë, trupa e artistëve do të shkojë drejt Korçës.
Më 4 mars, “Karnavalet” do i rikthehen vendit të zanafillës duke përcjellë të njëjtën alegri edhe në teatrin “Andon Zako Çajupi”.
Opereta “Karnavalet” u vu në skenë për herë të parë më 5 shkurt 1978. Një vepër e repertorit kombëtar, e cilësuar si një nga më të çmuarat e këtij lloji ku gërshetohet humori i hollë i personazheve dhe mënyra e të jetuarit elegante korçare, të cilat kanë lënë gjurmë të rëndësishme në kujtesën e kulturës artistike dhe sociale të shoqërisë sonë.
“Karnavalet” kësaj here erdhën nën regjinë dhe kujdesin e veçantë të Inva Mulës, si një homazh kushtuar babait të saj, Avni Mula, i cili është kompozitori i veprës, si dhe Luigj Gurakuqit, libretisti.
Ngjarja e viteve `30 të shekullit të kaluar, bazohet në një skenografi me imazhe grafike, që e tregon veprën me anë të projeksionit fragmentar të copëzuar në lëvizje, frymëzuar nga fotografi i madh, lindur në qytetin e Korçës, Gjon Mili.
Skenografia e parë paraqet shtëpinë e Nikollaqit, e krijuar me kuinta të cilat krijojnë idenë e rrugicave me kalldrëm të qytetit, e dyta është e gjitha e krijuar me telajo dhe mobilieri tipike të familjeve të pasura të qytetit, në kontradiktë më shpirtin e varfër të tyre, ndërsa e treta paraqitet me një sallon të dekoruar fiks për të shpallur fejesën e Afrovitit.
/r.e/
