ROMË, 27 shtator /ATSH/ – A e lani gjithmonë pulën nën ujë të rubinetit përpara se ta gatuani? E gabuar. Duke vepruar kështu, në fakt rrezikon rritjen e përhapjes së baktereve dhe rrezikun e infeksioneve, shkruan foucs.it.
Burime të ndryshme, si Agjencia Britanike e Standardeve të Ushqimit, kanë paralajmëruar për rreziqet që mund të sjellë shpëlarja e pulës së papërpunuar përpara se ta gatuani atë: spërkatjet e ujit të përdorur për ta larë atë nën rubinet mund të bartin baktere në zonat përreth, duke i depozituar ato në duar, në enët dhe në objekte pranë lavamanit, si dhe në rrobat e veshura.
Fajtori kryesor është ‘’Campylobacter’’, i pranishëm në shumë lloje të mishit dhe në një masë më të madhe te mishi i pulës, i cili mund të shkaktojë infeksione të zorrëve ose sëmundje më të rënda: për të reduktuar rreziqet është më mirë që mishi të gatuhet drejtpërdrejt, pasi vetëm gatimi siguron eliminimin e tij efektiv.
Për më tepër, në përgjithësi, në kuzhinë është më mirë të veçohen ushqimet e papërpunuara nga ato të gatuara dhe, padyshim, të lahen mirë veglat që përdoren për mishin e papërpunuar. /os/
