PRISHTINË, 11 shtator /ATSH/ Kryeministri i Kosovës Ramush Haradinaj, është shprehur optimist se edhe opozita do ta mbështesë Fatmir Limajn për të udhëhequr dialogun me Serbinë.
“Gjatë këtij viti pune, ne rëndësi i kemi dhënë punëve të shtëpisë, pra të brendshme. Sa i përket dialogut është çështje e ndjeshme dhe ne nuk iu ikim përgjegjësisë. Ne e kemi propozuar zotin Limaj që të jetë kryesues i delegacionit dhe besoj se edhe opozita do ta mbështes atë”, tha Haradinaj.
Ai pas mbledhjes së Qeverisë ka folur edhe për korrigjimin e kufijve. Sipas tij është rasti i parë që Qeveria ka shkuar me përkrahje kaq të madhe për Preshevën.
“Unë nuk kisha avancuar më shumë në këto rrethana. Është eksperiment i rrezikshëm puna e kufijve. Sa herë janë hap temat e kufijve, nuk është ditur kurrë kur do të mbyllen. Kosova nuk e ka luksin për të folur për këtë, kjo temë nuk dihet kur përfundon dhe kush përfiton nga kjo”, tha Haradinaj.
Haradinaj ka ftuar shqiptarët e Maqedonisë që ta votojnë referendumin për emrin ndërsa ka komentuar edhe deklaratën e presidentit Hashim Thaçi se Kosova nuk e ka vetëm presidentin për të vizituar Luginën e Preshevës.
Haradinaj dha përgjigje nëse do ta vizitojë luginën. “Si Ramush Haradinaj ndoshta po, si kryeministër nuk e di”, tha ai.
/KosovaPress/j.p/
