TIRANË, 2 maj /ATSH/ Java e 34-t e kampionatit “Abissnet Superiore” do të luhet të shtunën në orën 16:00.
Departamenti i Garave pranë Federatës Shqiptare të Futbollit njofton se janë pesë takime interesante që do të vendosin shumë për objektivat e skuadrave. Në “Niko Dovana” Teuta do të presë Egnatian e vendit të parë me synimin për të marrë një tjetër fitore që do ta largonte akoma më shumë nga vendi i 8-të, ndërsa rrogozhinasit do të kërkojnë të rikthehen te triumfi për të blinduar vendin e parë.
Vllaznia dhe Partizani janë vetëm një hap larg për të siguruar matematikisht një vend në “Final 4”. Kuqeblutë do të presin Dinamo City në “Loro Boriçi”, ndërsa të kuqtë do të përballen në “Arenën e Demave” me Skënderbeun.
Laçi – Tirana është një tjetër sfidë interesante që pritet të dhurojë spektakël këtë javë, pasi të dyja ekipet kanë si objektiv vetëm fitoren.
Ndeshja tjetër e javës së 34-të është Erzeni – Kukësi. Shijakasit do të synojnë fitoren ndaj verilindorëve për të mbajtur gjallë shpresat për vendin e 8-të në kampionat.
Gjithashtu, departamenti i Garave në FSHF bën me dije se ndeshja e javës së 34-t në kampionatin “Abissnet Superiore”, Erzeni – Kukësi, nuk do të luhet në stadiumin “Selman Stërmasi”, ashtu siç ishte planifikuar më parë, për shkak të gjendjes jo të mirë të fushës.
Ky takim do të zhvillohet në stadiumin “Adush Muça” të Ballshit, në të njëjtën ditë dhe orë (04.05.2024, 16:00).
