TIRANË, 24 tetor /ATSH/ Në Gjykatën Kundër Korrupsionit dhe Krimit të Organizuar zhvillohet sot seanca për masën e sigurisë ndaj ish-kryeministrit Sali Berisha në çështjen e ish-kompleksit sportiv “Partizani”.
Ish-kryeministri Sali Berisha ka refuzuar të paraqitet në GJKKO për t’u marrë në pyetje, ndërsa avokati i tij Genci Gjokutaj ka mbërritur pranë ambienteve të gjykatës.
Berisha zgjodhi të mbajë një konferencë me gazetarët në orarin e caktuar nga GJKKO për marrjen në pyetje të ish-kryeministrit lidhur me çështjen e ish-kompleksit sportiv “Partizani”.
Prokuroria e Posaçme Kundër Korrupsionit dhe Krimit të Organizuar ka vijuar hetimet ndaj Jamarbër Malltezit dhe Sali Berishës, për privatizimin e terreneve dhe objekteve sportive të “Klubit të Futbollit Partizani” dhe “Klubit Shumësportesh Partizani”.
Në vijim të hetimit, SPAK shprehet se është krijuar dyshimi i arsyeshëm, i mbështetur në prova se, nga shtetasi Sali Berisha është konsumuar vepra penale e “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim me shtetasin Jarmarbër Malltezi.
/r.e/
