VARSHAVË, 23 korrik /ATSH-DPA/ – Qendra e riparimit në Poloni, për tanket gjermane “Leopard 2”, që po përdoren në Ukrainë, është vënë në funksion, tha ministri polak i Mbrojtjes, Mariusz Błaszczak.
“Qendra e riparimit në Gliwice është në funksion! Dy tanket e parë “Leopard” tashmë kanë mbërritur në fabrikën e Bumarit nga Ukraina”, shkroi Błaszczak në Twitter.
Ministri gjerman i Mbrojtjes, Pistorius dhe homologu i tij Błaszczak ranë dakord në prill për të vënë në punë qendrën e riparimit.
Qendra ishte planifikuar të vihej në funksion nga kompania e prodhimit të armëve “Bumar-Labedy” në Gliwice, dhe të fillonte punën në maj. Por, punimet ndaluan.
Tanket “Leopard” nga Gjermania dhe Polonia, të cilat po përdoren nga Ukraina në luftën e saj kundër Rusisë, do të riparohen në këtë qendër.
Më herët në korrik, gjatë një vizite në Poloni, Pistorius kritikoi palën polake se ishte shumë e ngadaltë në vënien në punë të qendrës. //a.i/
