TIRANË, 30 qershor/ATSH/ Qendra për Hapje e Dialog ka mbyllur sezonin veror të ciklit të takimeve artistike “COD/ACT”.
Këtë herë, artistja Ema Andrea interpretoi për publikun fragmente nga romani “Në shtëpi”, i sjellë në shqip nga Botimet Dudaj, shoqëruar nga tingujt virtuozë të muzikantit Fatos Qerimaj.
Ky roman rrëqethës i shkrimtares së madhe amerikane Toni Morrison, fituese e Çmimit Nobel në Letërsi, na zbulon një njeri në dukje të mposhtur, i cili arrin të gjejë burrërinë, por, në fund, edhe shtëpinë, vendin të cilit i përket.
“COD/ACT” do të kthehet përsëri në shtator me të tjera performanca që ndërthurin tekstin poetik e narrativ me magjinë e skenës.
Ndërkohë COD përmes ciklit “ArtistTalk”paralajmëroi një tjetër aktivitet artistik, që do të vijë në jetë në fillim të vjeshtës. “Pressure of Freedom” do të jetë ekspozita e gazetarit të mirënjohur Ilir Paço, i cili ishte i ftuar në COD, në cilësinë e artistit. Së bashku me kuratoren Albana Kozeli, dr. Ahilino Palushi dhe gazetarin Enton Abilekaj u zhvillua një diskutim mbi ndërthurjen e fuqisë së medias me artin, përballë studenteve të arteve dhe arkitekturës. Gazetari solli për të pranishmit edhe një pjesë të skicave të tij, realizuar mbi letrat e lajmeve që prezanton në edicionet informative.
/r.e/
