TIRANË, 5 dhjetor/ATSH/ Tirana ka ndezur mbrëmjen e sotme dritat e pemës gjigande të Krishtlindjeve të vendosur në sheshin “Skënderbej”.
Sheshi qendror i kryeqytetit u gjallërua edhe më tepër nga atmosfera e krijuar nga fëmijët me repertorin e këngëve festive.
Kryetari i bashkisë, Erion Veliaj, i pranishëm në ceremoninë festive ftoi qytetarët të jenë solidarë, më të dashur dhe të ndihmojnë njëri-tjetrin, sepse vetëm kështu mund të kthehet në qytetin e ëndrrave.
“Kemi pasur një super vit për Tiranën, si “Kryeqyteti Evropian i Rinisë”, kemi pasur në këtë shesh edhe Rita Orën edhe Dua Lipën, Tirana ka pasur finalen e UEFA Conference League. Tirana do t’i thotë nesër mirëserdhët të gjithë liderëve të BE-së që për herë të parë vijnë në Ballkan dhe kanë zgjedhur Tiranën për të qenë sofra, dera e madhe, shtëpia e madhe që i mikpret të gjithë”, theksoi Veliaj.
Kryebashkiaku Veliaj u shpreh se “kjo është Tirana jonë, miq! Unë e di që jo çdo gjë është perfekt. Por kur bashkëpunojmë, kur duhemi, kur mbështesim njeri-tjetrin, kur i themi njeri-tjetrit bravo të qoftë, jam krenar për ty, ec përpara, Tirana ecën përpara. Ftesa për të gjithë, pavarësisht bindjeve është: Le ta përdorim këtë dhjetor për solidaritet, për dashuri me njeri tjetrin dhe për të kuptuar që kur ne bashkëpunojmë, nuk ka asgjë që i ndal shqiptarët, kur mblidhen në Tiranë dhe e kthejnë qytetin në qytetin e ëndrrave të tyre”.
Dritat festive kanë nisur të zbukurojnë Tiranën, duke sjellë një atmosferë të gëzueshme në prag të muajit dhjetor, gjatë të cilit festojmë Krishtlindjen dhe Vitin e Ri.
/k.s/
