LONDËR, 22 tetor /ATSH-ANSA/ – Parlamentari konservator britanik, Tobias Ellwood pretendon në Twitter se me mbështetjen e tij ai është përkrahësi i njëqindtë i pretendentit për lider të partisë dhe kryeministër, Rishi Sunak.
Nëse kjo rezulton e vërtetë, atëherë do të thotë se ish-kancelari ka tejkaluar pragun e nevojshëm të mbështetësve në Dhomën e Komuneve për të kandiduar drejt udhëheqjes së konservatorëve.
Një burim nga fushata për mbledhjen e numrit të duhur të deputetëve e konfirmon këtë për agjencinë Press Association duke shtuar se ”Sunak arriti numrin magjik”.
Mes konservatorëve të tjerë që kohët e fundit kanë deklaruar se do të mbështesin Sunak është edhe ish-ministri i Shëndetësisë, Matt Hancock.
Sigurisht, ende nuk ka një njoftim zyrtar nga Sunak për qëllimin e tij për të kandiduar.
Pas dorëheqjes së kryeministres Truss, kandidatura tjetër e mundshme përveç Sunak, është edhe ish-kryeministri Boris Johnson./ a.jor.
