ROMË, 11 nëntor /ATSH-DPA/ – Speci djegës është i mirë për zemrën dhe zgjat jetën, sipas rezultateve të një studimi paraprak të Shoqatës Amerikane të Zemrës, sipas melarossa.it.
Speci djegës është fryt i një bime që i përket familjes Capsicum, nga e cila vijnë edhe llojet e ndryshme të specave.
Është një ushqim i pasur me veti të dobishme për trupin tonë.
Në fakt, falë kapsaicinës, alkaloidit që e bën atë pikant, ka veti natyrale vazodiluese, në gjendje të relaksojë enët e gjakut dhe të ulë presionin.
Sasia e lartë e vitaminës C e pranishme në specat djegës gjithashtu i jep përfitime kundër kancerit.
Në fakt, acidi askorbik është një antioksidant i fuqishëm, i cili forcon sistemin imunitar, lufton efektin e radikaleve të lira, mbron organizmin nga ndotësit, parandalon sëmundjet degjeneruese si kanceri.
Përveç kësaj, ndihmon tretjen dhe ka një efekt analgjezik.
Specat djegëse janë një ilaç për shëndetin tonë. Në thelb, ata që e konsumojnë mund të jetojnë më gjatë dhe të kenë një rrezik të reduktuar të vdekjes nga sëmundjet kardiovaskulare ose kanceri.
Të dhënat për shëndetin dhe dietën e mbi 570 000 personave nga SHBA, Italia, Kina dhe Irani u analizuan për të gjetur dallimet midis atyre që konsumuan spec djegës dhe atyre që nuk e përdornin kurrë ose rrallë.
Krahasuar me ata që nuk konsumonin spec djegës ose që e bënin rrallë, analiza zbuloi se njerëzit që hanin djegës kishin një reduktim relativ në 26% të vdekshmërisë kardiovaskulare dhe 23% të vdekshmërisë nga kanceri.
“Ne jemi të befasuar kur zbuluam se në studimet e analizuara, konsumimi i rregullt i specit djegës u shoqërua me një reduktim të përgjithshëm të rrezikut nga të gjitha shkaqet, sëmundjet kardiovaskulare dhe vdekshmërinë nga kanceri”, tha Bo Xu, kardiolog në Klivlend./ /os/
