VJENË, 8 tetor /ATSH-APA/ – Agjencia austriake e lajmeve, APA festoi 75-vjetorin e krijimit me një ceremoni, ku ishte i pranishëm edhe presidenti i vendit, Alexander van der Bellen.
Në këtë përvjetor ishin të ftuar edhe agjencitë partnere të APA-s, përfshirë Agjencinë Telegrafike Shqiptare, që u përfaqësua nga drejtoresha e përgjithshme, Valbona Zhupa.
”Me lajmet e saj të besueshme, të bazuara në fakte dhe objektive, kjo agjenci përfaqëson një bazë për demokracinë liberale”, deklaroi presidenti Bellen.
“APA është e kudogjendur. Me vullnetin më të mirë nuk mund të mbaj mend një konferencë për shtyp në të cilën APA nuk mori pjesë. Kështu agjencia e lajmeve përmbush misionin e saj, të raportojë mbi ngjarjet, shpejt dhe në mënyrë të pavarur dhe objektive”, theksoi ai.
“Lajmet e besueshme janë baza për demokracinë tonë liberale”, kujtoi presidenti.
”APA na e jep këtë çdo ditë, orë për orë, minutë për minutë, do të doja t’ju falënderoj për këtë sot dhe t’ju uroj gjithë të mirat për përvjetorin tuaj”, përfundoi ai.
Markus Mair, president i Shoqatës së Gazetave Austriake dhe shef i Grupit të Mediave ”Styria” theksoi se ”ishte e jashtëzakonshme që gazetat e përditshme austriake të kohës u bashkuan pas Luftës së Dytë Botërore për të gjetur një agjenci lajmesh që ishte e pavarur nga shteti. Pavarësia editoriale e APA-s sigurohet edhe nga pavarësia dhe forca ekonomike. Kjo është, nëse dëshironi, ADN-ja e agjencive të pavarura të lajmeve”.
Karin Thiller, drejtoreshë menaxhuese e APA-s, theksoi se agjencia e lajmeve po zhvillohet vazhdimisht.
”Për shkak të strukturës së saj bashkëpunuese, APA është një platformë nga ku përfitojnë të gjithë në industrinë e medias”, deklaroi Thiller./ a.jor.
