YouTube pezullon kanalin Sky News Australia për keqinformim

SIDNEI, 2 gusht /ATSH-AFP/ – YouTube njoftoi se ka pezulluar Sky News Australia nga platforma e tij e ndarjes së videove për një javë, për shkak të informacionit të rremë për COVID-19.

Ky veprim vjen pas një analize të videove të ngarkuara nga kanali televiziv në pronësi të manjatit mediatik Rupert Murdoch.

“Ne kemi politika të qarta të vendosura mbi informacionet e rreme në lidhje me COVID-19 (…) për të parandaluar përhapjen e informacionit të rremë në lidhje me koronavirusi,n që mund të dëmtojë botën reale”, tha YouTube në një deklaratë.

Me 1,86 milionë abonentë në YouTube, kanali ndiqet edhe përtej Australisë.

Postimet e tij, disa prej të cilave vënë në dyshim ekzistencën e një pandemie dhe efektivitetin e vaksinave, shpërndahen gjerësisht në mediet sociale në të gjithë botën.

Tri ditë më parë, kanali publikoi një kolonë në të cilën një mikpritës, i njohur për armiqësinë e tij ndaj kufizimeve shëndetësore, kritikoi veçanërisht vendimin e autoriteteve për të zgjatur mbylljen në Sidnei.

YouTube ka tre lloje ndëshkimesh për shkeljet: e para është një pezullim njëjavor, pastaj dy javë për një shkelje të përsëritur brenda 90 ditëve dhe, më në fund, një heqje e përhershme nga platforma./ /ervo/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.