UASHINGTON, 29 qershor /ATSH-AFP/ – Viktima e parë e njohur e murtajës me sa duket është një gjahtar, i cili jetoi 5 000 vjet më parë në Letoninë e sotme dhe që ishte bartës i baktereve që shkaktonin sëmundjen, zbuluan sot studiuesit.
Murtaja shkaktoi një shkatërrim mijëravjeçar të njerëzimit, duke zhdukur deri në gjysmën e popullsisë së Europës në shekullin XIV, gjatë Vdekjes së Zezë, por shkencëtarët kanë qenë prej kohësh në mëdyshje për origjinën dhe evolucionin e saj.
Njeriu në fjalë, i quajtur “RV 2039”, ishte në të njëzetat.
Skeleti i tij u gjet në fund të shekullit të XX, por më pas u zhduk dhe u rizbulua në 2011.
Mbetjet e tij tregojnë bakterin Yersinia pestis, sipas hulumtimit të botuar në revistën “Cell Reports”.
“Analizat e llojit që kemi identifikuar tregojnë se Yersinia pestis evoluoi më herët sesa mendonim”, tha Ben Krause-Kyora i Universitetit të Kiel në Gjermani.
“Gjetja e këtij bakteri ishte me të vërtetë një befasi”, shtoi Krause-Kyora.
Sipas ekspertëve, gjurmimi i historisë së Yersinia pestis mund të ndihmojë për të kuptuar se si vetë njeriu evoluoi për të mbrojtur veten./ /ervo/
