TIRANË, 2 qershor/ATSH/ Këshilli Mbikëqyrës i Bankës së Shqipërisë miratoi sot mënyrën e re të llogaritjes së fiksit të kursit të këmbimit të lekut në Bankën e Shqipërisë.
Ndryshimet e rregullores ekzistuese vijnë me synimin kryesor zhvillimin e tregut të derivatëve në Shqipëri, si instrument mbrojtës ndaj rrezikut të kursit të këmbimit si dhe rritje e transparencës në tregun valutor.
Ndryshimet kryesore konsistojnë në zgjerimin e bazës së pjesëmarrjes së bankave tregtare me 4 banka duke zëvendësuar zyrat e këmbimit valutor si dhe publikimin e 10 bankave pjesëmarrëse të “Fiksit” në faqen zyrtare të internetit të Bankës së Shqipërisë.
Po ashtu, ndryshimet parashikojnë publikimin nga ana e Bankës së Shqipërisë të çmimit “Bid” dhe “Ask” që përfaqësojnë çmimin mesatar me të cilin sistemi bankar është i gatshëm të blejë dhe shesë dollarin amerikan dhe euron kundrejt lekut, si dhe standardizimin e shumës së tregtimit në tregun ndërbankar.
Këshilli Mbikëqyrës në mbledhjen e sotme u njoh dhe me informacione të tjera të lidhura me veprimtarinë e përditshme funksionale dhe operacionale të Bankës së Shqipërisë.
/m.m/r.e/
