Izraeli dërgon mision ndihmës në Shqipëri

TIRANË, 3 dhjetor  /ATSH – I. Vata/- Ministri i Punëve të Jashtme të Izraelit, Izrael Katz deklaroi sot se një mision special i ndihmës izraelite u nis sot drejt Shqipërisë.

“Ky mision ndihmës është dëshmi për marrëdhëniet e shkëlqyera midis dy vendeve dhe dialogut të ngushtë që ata kanë mbajtur gjatë viteve të fundit, si në nivelin qeveritar, ashtu edhe midis popujve. “, theksoi ai.

Në një komunikuar nga Zëdhënësi i MPJ-së të Izraelit thuhet se “Një mision special i ndihmës izraelite u nis sot për Shqipërinë, pas tërmetit shkatërrues që goditi atë vend. Misioni i ndihmës, i cili u organizua nga Ministria e Punëve të Jashtme me pjesëmarrjen e Këshillit të Sigurisë Kombëtare dhe Komandës së Brendshme të IDF dhe me ndihmën e Ministrisë së Mbrojtjes, përbëhet nga 10 oficerë dhe inxhinierë të cilët do të studiojnë ndërtesat e dëmtuara për të përcaktuar nëse ato mbesin strukturore të shëndosha pas tërmetit. Artikujt e përfshirë në dërgesën e ndihmës humanitare përfshijnë çadrat që do të përdoren si banesa emergjente dhe mbështetje logjistike për viktima.

Po ashtu bëhet e ditur se “Misioni drejtohet nga komandanti i Brigadës Kombëtare të Kërkimit dhe Shpëtimit, Kolonel (Res.) Golan Wach.”

“Pas mbërritjes së tyre në Shqipëri, delegacioni izraelit do të lidhet me ekipin e ambasadës së Izraelit në Tiranë të kryesuar nga Ambasadori Noah Gal-Gendler, i cili po koordinon aktivitetet e misionit. Në përputhje me kërkesën e qeverisë shqiptare, anëtarët e misionit do të vizitojnë zonat e prekura të vendit për të studiuar ndërtesat e dëmtuara me qëllim parandalimin e shembjes së tyre. Ky aktivitet do të kryhet në koordinim me autoritetet shqiptare dhe në bashkëpunim me ndihmën humanitare që do t’i ofrohet popullatës së përgjithshme dhe shpërndarjen e tendave që do të përdoren si banesa emergjente”, thuhet në komunikatë, nga Zëdhënësi i MPJ-së të Izraelit. /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.