Bashkia Pukë, masa parandaluese për dëmtimin e pyjeve

TIRANË, 18 tetor/ATSH/ Dëmtimi i pyjeve të Pukës nga sot e në vazhdim, do të rëndojë mbi vetë inspektorët për ruajtjen dhe menaxhimin e tyre. Ky është paralajmërimi i kreut të bashkisë, Gjon Gjonaj gjatë takimit në Sektorin e Shërbimit Pyjor pranë bashkisë.

Kryebashkiaku e ka konsideruar si absurd faktin se disa furgonë qarkullojnë me lëndë drusore në mënyrë të paligjshme dhe askush nuk i ndëshkon, teksa po dëmtohet pa kriter ekonomia pyjore.

Kryetari i bashkisë së Pukës, Gjon Gjonaj e ka konsideruar abuzive edhe lëshimin e mandateve me vetëm tre metërkub lëndë drusore, ndërkohë që është e pamundur që një automjet të ngjitet në pyll për vetëm tre metërkub drurë.

“Bëni kujdes, sepse kjo është një mënyrë abuzimi duke shfrytëzuar mandatin e paguar për tre metër kub lëndë drusore e duke marr në pyll sasi më të mëdha drurësh”, – tha kryebashkiaku në takimin që zhvilloi në shërbimin pyjor.

Nga sot punonjësit e Shërbimit Pyjor pranë bashkisë Pukë do të vendosen me grafik në postobllok, me qëllim kontrollin e automjeteve që transportojnë lëndë drusore. Njëkohësisht Shërbimi Pyjor do të përgatisë një informacion për Policinë e Shtetit për të gjitha mjetet që dyshohet se transportojnë lëndë drusore.

/m.z/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.