Për herë të parë këtë vit, libra falas edhe për klasat e pesta

TIRANË, 2 shtator/ATSH/ Shpërndarja e librave falas edhe për klasat e pesta që ka nisur sot, është një tjetër premtim i mbajtur. Kryeministri Edi Rama, pas shpërndarjes së librave falas për herë të parë vitin e kaluar, u zotua se këtë vit ato do të ishin edhe për klasat e pesta.

Kështu, ministrja e Arsimit, Sportit dhe Rinisë, Besa Shahini, njoftoi sot se nisi shpërndarja e librave falas, edhe për klasat e pesta.

“Filloi shpërndarja e librave FALAS, ku sipas premtimit këtë vit shkollor përfshihet edhe Klasa V. Sezoni shkollor 2019-2020 Libra FALAS për të gjithë fëmijët nga Klasa I – V si edhe deri në klasën XII, për të gjithë ata fëmijë që vijnë nga familje me ndihmë ekonomike apo janë me nevoja të veçanta”, – tha Rama.

Ndërsa vitin e kaluar rreth 125 mijë nxënës nga klasat e para deri në klasat e katërta kanë përfituar libra falas, për vitin e ri shkollor 2019-2020 numri i përfituesve është rritur në 155 mijë, pasi kësaj skeme i janë shtuar edhe nxënësit e klasave të pesta.

Shpërndarja e librave shkollorë ka filluar sot.

/z.tosku/j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.